Soos elke vrou ’n swart
rokkie in haar kas moet hê, moet elke kombuis ook ’n goeie en maklike
sjokoladekoekresep hê. Dié een sal jou nooit in die steek laat
nie en kan van kolwyntjie tot groot koek wees. Dit was selfs al te sien op
kykNET se Koekedoor as die wenkoek van episode 1!

Genoeg vir 1 koek

5 Pink Lady appels

195 g (210 ml) botter

410 ml water

70 g (175 ml) kakaopoeier

420 g (750 ml) koekmeel

10 ml koeksoda

10 ml bakpoeier

600 g (710 ml) strooisuiker

3 eiers

190 ml karringmelk

200 g (250 ml) witsuiker

250 ml water

Sjokoladeversiersel:

650 g goeie sjokolade

500 ml room

125 g bessies

ekstra kakaopoeier vir rol

Spuit patroonpan met volume van 2 liter met kleefwerende
kossproei. Sny appels in papierdun skywe en voer die pan met die appelskywe
uit. Verhit oond tot 160 °C. Plaas botter en water in middelslag-kastrol en
bring tot kookpunt. Voeg kakao by en meng. Sif meel, koeksoda, bakpoeier en
suiker saam. Meng eiers en karringmelk. Voeg karringmelkmengsel by droë
bestanddele en meng goed. Gooi beslag in pan en bak 40-45 minute of tot
toetspen skoon uitkom. Bring suiker en water tot kookpunt en laat afkoel. Gooi
oor koek sodra dit uit die oond kom. Laat in pan afkoel vir 10 minute en keer
uit op afkoelrak. Vir die sjokoladeversiersel: bring room tot kookpunt en gooi
oor gekapte sjokolade. Roer tot gladde mengsel. Laat effens afkoel. Plaas
afgekoelde koek op dienbord en gooi sjokoladesous oor. Rol bessies in kakao en
pak bo-op. Sit voor.