Genoeg vir 1 koek van 20 cm

Koekbestanddele

300 g (325 ml) sagte botter 

620 g (1 190 ml) versiersuiker

6 eiers

100 g pistasieneute, fyngemaal 

4 kardemompeule, fyngemaal 

370 g (660 ml) koekmeel

10 ml bakpoeier

250 ml Pink Lady-® appels jogurt

1 Pink Lady-® appel, fyngerasper

100 ml melk

180 ml suurlemoensap

Versiersel

2 eierwitte

90 ml koue water

300 g (375 ml) strooisuiker 

250 ml gekoopte suurlemoensmeer

1 Verhit oond tot 180 °C. Voer drie losboompanne van 20 cm in deursnee uit met bakpapier en spuit goed met kleefwerende kossproei. 

2 Verroom botter en versiersuiker saam tot lig en romerig. Voeg eiers een-een by en klits deurentyd. Voeg res van koekbestanddele behalwe suurlemoensap by en meng tot gladde beslag vorm. 

3 Verdeel beslag tussen die drie panne en bak 30-45 minute of tot toetspen skoon uitkom. Haal uit oond en gooi suurlemoensap oor. Laat afkoel en keer uit. Sny elke koeklaag gelyk bo en verdeel in twee lae elk. 

4 Versiersel Bring kastrol met water tot kookpunt en plaas mengbak wat stewig pas bo-op. Klits eierwitte, water en strooisuiker 7 minute lank met elektriese klitser oor kookwater tot blink en styf. Verwyder van hitte en klits verder tot koel. 

5 Plaas ’n koeklaag op bord en smeer paar lepels vol suurlemoensmeer oor. Plaas tweede laag bo-op. Herhaal tot lae op is. Smeer buitekant van die koek met afgekoelde meringue. Brand bruin met kombuisblaasvlam en sit voor.